Ni Ramie E. Catalan, Jr.
Programmer, DYVS 1233 khz
"Pangamuyo sa Kagab-ihon 10PM

Mamingaw ang Kabuhi kon Wala si Misis

Kon aton gid lang admitihon nga mga lalaki, mabudlay gid sa aton kon wala sing babaye. Ang buot ko silingon nga mabudlay sa aton mga mga lalaki kon wala kita sing asawa, ukon nagaisahanon lang kita sa pangabuhi tubtob sa aton pagtigulang.

May isa ka leyenda didto sa India nga ginsugid nahanugod sa pagtuga sang Dios sa lalaki kag babaye. Matapos kuno nga matuga ang lalaki, ang Manunuga nakatalupangod nga naubos niya sing gamit ang matig-a nga mga bagay kag wala na sing solido nga mga bagay nga nabilin agud magamit niya sa paghimo sa babaye. Matapos makapanghunahuna ang Manunuga, kon ano nga butang ang gamiton niya sa pagtuga sa babaye, ginkuha niya ang kabilog sang bulan, kag ang pagkahawodhawod sang balagon. Ginkuha niya ang pagkurogkurog sang hilamon kag ang kagamay sang tabun-ak. Ginkuha niya ang pamukadkad sang bulak kag ang kamag-an sang dahon. Ginkuha niya ang katawhay sang silak kag qang kahadlok sang kuneho. Ginkuha niya ang pagkagarbosa sang dughan sang pispis kag ang katig-a sang diamante. Ginkuha niya ang katam-is sang dugosa kag ang kabangis sang tigre. Ginkuha niya ang kagahod sang gansa kag ang pagkapalakanta sang tulihaw. Ginkuha niya ang pagkadimaminatud-on sang tulabong kag ang katutom sang nanay nga leon. Pagkatapos nga matipon niya ining indi solido nga mga bagay, ginsamo niya ini, ginhimo nga isa ka babaye, kag dayon ginhatag sang Manunuga sa lalaki. Daku ang kalipay sang lalaki sa paghatag sa iya sang Dios sang babaye.

Pagkaligad sang isa ka semana, ang lalaki nagpalapit sa Manunuga kag nagreklamo: Ginuo, ang babaye nga ginhatag mo sa akon naghimo sang akon kabuhi nga isa ka miserable. Wala sia untat sa paghambal kag halos indi ajo makapahuway. Nagapamilit sia nga hatagan ko sia sing atensyon. Nagareklamo sia kon indi ko sia mahatagan sang goodnight kiss, kag nagasunggod kon indi ko madumduman ang petsa sang iya birthday. Nagareklamo sia sa gamay nga butang kag nagabasolbasol sa akon. Gani nagkari ako agud nga iuli ko sia sa imo." Ang Manunuga nagsabat: "Sigi, kuhanon ko sia sa imo."

Pagkaligad naman sang isa ka semana, ang lalaki nagbalik sa Manunuga kag nagsiling: "Ginuo, ang akon kabuhi nangin masinulub-on sugod sang ibalik ko sa imo ang babaye nga ginhatag mo sa akon. Sia gid lang ang yara pirme sa akon panumduman. Madumduman ko kon paano sia nagsautsaut kag nagkanta kanta. Kon paano nga gintulok niya ako sang nagahuloy niya nga mga mata kag magpulupangilay sa akon. Kon paano sia naghutik sa akon sing "I love you," kag magkupkop sa akon dughan sa matugnaw nga kagab-ihon. Tama sia katahum tulukon kag kalum-ok hakuson. Indi ko mabuhi kon wala sia. Gani ibalik mo sia sa akon." Ang Manunuga nagsabat: "Sigi, ibalik ko sia sa imo."

Pagkaligad sang tatlo ka adlawa, ang lalaki nagbalik naman sa Manunuga kag nagsilinga: "Ginuo, indi ko mapaathang kag indi ko mahangpan. Apang pagkatapos sang akon eksperyensya sa pagpakig-upod sa sini nga tinuga mo nga babaye, akon nabiangbinag nga nagahatag lang sia sing daku nga kagamo sa akon nga kabuhi.

Gani ginahinyo ko nga kuhaa sia liwat sa akon. Indi ako mabuhi kon yara sia." Ang Manunugan may katig-a nga nagsabat: "Indi ka mabuhi kon yara sia, kag indi ka man mabuhi kon wala sia. Bahala ka. Indi ko na sia pagkuhaon sa imo." Kag gilayon nagtalikod ang Manunuga sa paglakat.

Mga Mister, sa pagkamatuod indi kiya mabuhikon wala si Misis. Ang buot ko silingon nga masubo kag mamingaw ang kabuhi kon wala si Misis, ukon wala sing Misis. Ang mga laon, mga balo kag mga binayaan, makasugid sini sa aton. Masubo ang kabuhi kon nagaisahanon lamang kita nga mga lalaki.

Nadumduman naton si Adam. Yara sa tunga sang Paraiso. Hamungaya kag malinong ang kabuhi, kag ang iya pagpangabuhu. Apang nagaisahanon kag masinulub-on. Gindala sang Dios ang tanan nga mga kasapatan kag tanan nga mga kapispisan sa kay Adam, apang ang Bibliya nagasiling nga "sa kay Adama wala sing nakita nga kabulig nga bagay sa iya." Sa isa ka polong, nakitya sang Dios ang kasubo sa sulod sang tagipusuon ni Adam. Gani gintuga Niya ang babaye nga si Eva.

Apang paano abi kon si Misis daw makaulugot, ukon daw makatalaka? Ah, ginasiling gani nga "Love is a feeling to be learned." In other words, ton-i nga higugmaon si Misis. Ang sikreto ginlaygay ni Apostol Pablo sa Efeso 5:28: "Ang mga bana dapat maghigugma sang ila mga asawa subong sang ila kaugalingon nga mgaw lawas. Ang nagahigugma sang iya asawa nagahigugma sang iya kaugalingon."

Gani Mister, higugmaa si Misis, subong nga ini inyo ginasaad sa matrimonya sang inyo kasal, sa paghigugma kag pag-updanay sa tagsa-tagsa, "sa kabuganaan kag sa kinawad-on, sa kalipay kag sa kasulub-on, sa balatina kag sa maayong panglawason, tubtob nga bulagon kamo sang kamatayon. May God bless you!*