Ni Nonoy Alacapa
Brgy. Villamonte, Bacolod City

Alas 4 pa lang sang aga, gatig-ang na sila...
sa dahon sang saging pinutos nga KAN-ON kag UGA.
Sa kilid sang ila bulsa
ginhigot ang matalum nga GUNA
Sa KAMPO ang TUBO ang diritcho nila.

Imbis LAPIS, PAPEL kag LIBRO ang dal-on
magluwas sa guna, SADOL kag LAMINGKO ila nga
gamiton, sa TUBURAN sila ga inom kon SILA UHAWON.

Ang malapad nga HACIENDA ila HILAMUNAN,
Sa INIT sa UDTONG ADLAW
para lang makabakal BUGAS kag SUD-AN.

Daw haluson MAKALAPAK sa ESKUWELAHAN
tungod pigado gid katama ang mga ginikanan
GANI, PANGILAMON na gid lang sa KAMPO
ang ila NADANGTAN para indi lang MAGUTOMAN.

Ano nga BUWAS-DAMLAG ang naga hulat sa ila?
BAKERO SI TOTO...SI INDA LABANDERA
DRIBER SA TATAY...ATSAY NAMAN NANAY
TAG-IYA SANG MGA HACIENDA
MGA OBRERO N’YO PA ESKUWELAHA
KAY ANG EDUKASYON “KARAPATAN” MAN NILA